VACUNACION CONTRA INFLUENZA


ORANJESTAD, Aruba –26 di october, 2020:

Campaña anual di vacunacion contra Influenza organisa pa Departamento di Salud Publico a cuminsa.


¿Dicon e vacuna contra influenza ta bon?

Influenza ta un malesa potencialmente grave cu por hiba un persona na wordo hospitaliza y den ocasionnan severo, por hasta provoca morto. Cada temporada di influenza ta diferente y e infeccion ocasiona pa e virus di influenza por afecta hende di diferente manera.


E vacuna anual contra influenza ta e miho forma pa wordo proteha contra e malesa aki. Ta cientificamente demostra cu e vacuna aki tin hopi beneficio, manera e reduccion den e riesgo pa desaroya complicacion pa motibo di influenza, hospitalizacion y dañonan severo na salud.


Actualmente e vacuna contra influenza ta wordo administra di manera gratuito na esnan den e grupo di riesgo cu ta personanan cu:

  • ️Bronkitis

  • ️Pulmonia

  • ️Griep constante

  • ️60 aña y mas

  • ️Mucha bou di 5 aña

  • ️Malesanan cronico of malesa di sistema respiratorio

  • ️Obesidad

  • Ta na estado

  • ‍Tin un sistema inmunologico abou door di malesanan manera cancer y HIV.


Siguientemente nos schedule di vacunacion contra influenza pa e siman aki:

  • Diamars 27 di october y 3 di November: Centro di Bario Noord / 9am-12pm

  • Diahuebs 29 di october: Centro Playa Pabou / 9am-12pm

  • Diabierna 30 di october: Centro Curazon Santa Cruz / 9am-12pm

  • Dialuna 2 y 9 di November: Centro di Bario Brazil / 9am-12pm


Esnan cu ta cualifica pa ricibi e vacuna gratis mester presenta cu nan recept di Dokter di Cas y nan Zorgpas di AZV na un di e localidadnan riba orario di nan cita. Adultonan mayor di 60 aña mester presenta solamente cu nan Zorgpas di AZV valido. Pa por yega na un di e localidadnan ta nesesario traha un cita atravez di www.dvg.aw of por yama 5224239 of 5224241.


Tur otro persona cu ta interesa pa wordo vacuna, pero no ta cay den e grupo di riesgo, por cumpra e vacuna cu ta solamente disponibel na seccion di Malesanan Infeccioso. Pa cumpra e vacuna mester haci un cita online via www.dvg.aw. Ariba e website lo encontra un link pa por traha un cita pa campaña di vacunacion contra influenza. E vacuna no lo ta disponibel pa cumpra na niun otro luga.


Pa esnan cu no tin acceso na internet, por haci un cita pa cumpra e vacuna telefonicamente yamando na 5224239 of 5224241. Nos ta prefera pa e proceso bay via un cita online, ya cu nos telefonnan ta constantemente ocupa relaciona cu e maneho di e crisis di Covid-19; si toch ta dicidi di yama, por fabor, tene pasenshi.


E vacuna tin un costo di fl 20,- cu por wordo paga unicamente cu bo carchi di banco (swipe), no ta permiti pa paga cu placa cash.


Departamento di Salud Publico tey pa bo, nos kier bo bon!