Update | 25/11/2020

Casonan ta subiendo poco poco atrobe. Ta urgi comunidad pa sigui cuida durante dianan di fiesta.


ORANJESTAD, 25 november 2020

Segun resumen di awe 14 persona a recupera di covid, a keda registra un total di 27 caso nobo di Covid-19, di cual 2 ta no-residente, ("positivity rate" awe ta 27%).


Casonan activo pa awe ta na 101, total di testnan haci na airport y hospital hunto ta 370, testnan haci na laboratorio di hospital so ta 89, total di casonan di fayecimento relaciona cu Covid-19 ta na 45


Averahe di casonan pa dia abase semanal ta 13 caso y averahe di "positivity rate" pa dia abase semanal ta 16%


Hospital ta informa cu tin un total di 7 persona interna di cual 2 ta den Cuido Intensivo y 5 isola riba piso general.


Segun datos di e cifrasnan por observa cu e casonan ta subiendo poco poco. Ta tumando nota di clusternan cuta formando cu mas frecuencia. Sea den seno familiar, na pia di trabou of despues di actividad social entre amigonan.


Ta urgi cada persona pa sigui proteha bo mes na tur instante. Bo no sa kende por tin e virus pa cual motibo bo mester sigui proteha bo mes.


Flexibilisacion di e medidanan no nifica cu e risico of peliger di contrae covid a pasa. Flexibilisacion nifica cu como individuo bo tin e responsabilidad pa cuida bo mes mas ainda.


E yamado ta na comunidad pa den e dianan di fiesta venidero, sigui mantene distancia, sigui aplica higiena, sigui uza tapaboca, sigui test pa covid sibo tin sintoma, sigui mantene isolacion of cuarentena ora bo wordo instrui, sigui cumpli y sigui cuida. Di forma aki nos lo por disfruta di e dianan festivo sano den compania di nos famia y sernan stima.


Aruba ta conta cu bo!