Un aumento den “Positivity Rate” pa dia, kiko esaki por ta nifica?


Ta registrando un reduccion leve den casonan positivo pero alavez un aumento den “Positivity rate” pa dia, kiko esaki por ta nifica?


ORANJESTAD, Aruba – 04 april 2021: Seccion Epidemiologico di Departamento di Salud Publico cu ta encarga cu monitor di cifrasnan di COVID-19, a bin ta observando un patronchi preocupante den resultado di cifrasnan di COVID-19 pa dia y pa cual motibo ta alerta comunidad riba esaki.


Resultado di e cifrasnan den e ultimo dianan aki ta indica cu e cantidad di casonan positivo pa dia ta mustra di ta bahando. Sinembargo e data aki pa seccion di Epidemiologie no ta bisa unicamente cu e casonan ta bahando, pa motibo cu hunto cu e reduccion den caso positivo pa dia ta observa tambe cu e cantidad di testnan cu ta wordo haci pa dia tambe ta bahando mientras cu e ‘positivity rate’ si ta subiendo. Epidemiologicamente esaki tin un splicacion y esey ta cu; e virus ta plamando den comunidad bou di nos radar na cualkier caminda.


Ta sospecha cu tin hopi persona canando rond cu e virus y no ta test of ta tarda pa bay haci nan test di covid. Cu esaki nos ta referi cu e persona ta keda move rond sin haci un test, kisas pa e no wordo limita di su actividadnan of ta pensa cu su sintomanan no ta di COVID, cu e consecuencia cu e ta sigui pega otro hende cu e virus. E personanan aki cu ta hiba e virus cu nan y ta plamando esaki por ta tur caminda y por ta cualkier persona. Bo por encontra cu e persona aki na bo trabou, den actividadnan social y hasta na misa. E persona por ta bo colega, bo amistad of bo famia. P’esey ta importante pa cada persona sigui mantene su mes na e reglanan y consehonan brinda pa bo propio proteccion y e momento cu bo presencia e prome sintoma parecido na un griep manera dolor di garganta of nanishi ta core pa contact bo dokter di cas pa por haci un test of yama 280.0101. No keda cana cu sintoma of pensa cu loke bo tin no ta COVID, pasobra e por ta COVID y mientras bo ta sigui cana rond, bo ta plam’e.


Pa sigui limita e risico di contagio, mantene distancia di actividadnan social unda tin hopi persona, mantene distancia di 1.5 meter di otro individuo y uza bo tapa boca adecuadamente. Tambe laba bo man frecuentemente, hopi importante prome cu come y evita mishi den boca, nanishi y wowo. E medidanan aki no ta garantisa bo proteccion 100% pero ta yuda minimalisa e risico un poco. Pa e virus di COVID-19 no tin un tratamento, pa virus no tin medicamento y esaki ta e motibo pakico prevencion ta sigui ta asina importante y pa comunidad sigui test mas tanto posibel y mas lihe posibel na prome señal di sintomanan.

official-white.png
DVG-Logo-stroke.png

Si un hende of bo persona ta sinti malo, NO sali for di cas.

Pero yama bo dokter di cas pa haci un test.

logo-gob-dvg.png