Oranjestad, 22 september 2020 - Analisando con infeccion di Covid-19 ta sosodiendo na Aruba, cu hopi casonan sosodiendo na pia di trabao den diferente sector, ta importante pa cada instancia sa cu nan mester tin un Covid-19 Supervisor. Sea ta un departamento di Gobierno, supermercado, oficina, centro commercial, restaurant, bar, tienda, iglesia, organisacion social, deportivo, instituto di cuido of educativo. E supervisor tin e tarea pa percura pa e reglanan di e Protocol pa area di trabao y negoshi ta wordo cumpli cu ne. Den e sigiente simanan, e Taskforce cu awor ta conta cu un cantidad mas amplio di personal lo bay cuminsa realisa controlnan mas regular na tur instancia. Den e comunicado aki a dicidi pa inclui e Protocol pa area di Trabao y Negoshi tambe pa asina tur hende por lese y tin e.
Mantene tur e medidanan necesario ta e responsabilidad di cada dunado di trabao y esaki lo wordo supervisa pa un grupo di trabao. Durante e control, e grupo di trabao (taskforce) lo verifica e reglanan abao menciona. Den caso di falta di cumplimento, e dunado di trabao en cuestion por ser ordena di cera su establecimento conforme na e ley y reglamentonan ariba menciona.
Kiko un Covid-19 Supervisor mester sa y haci:
Conoce e Protocol cu ta valido pa su compania of instancia, click pa wak protocolnan.
Reuni cu Gerencia di e instancia of compania pa informa di aplicacion di e reglanan na bienestar di tur colega di trabao y cliente.
Si tin reglanan cu falta pa cumpli cu nan, informa y discuti e asunto cu mas miembro di e team di maneho of gerencia pa resolve esaki.
Riba e website www.arubacovid19.org tin hopi informacion y tips cu por haci bon uzo di nan.
Si tin trahado cu ta den cuarentena y mester traha, mester tin extra atencion pa mantene distanciamento social.