Toque de Queda ta keda prolonga te cu dia 7 di Januari


Oranjestad, 3 Januari, 2021 – Na promer lugar Crisis Team di Gobierno di Aruba ta desea di duna nos comunidad un Bon Aña 2021, gradiciendo pa e cooperacion den aña 2020 y pa hunto cu solidaridad y disciplina nos sigui cumpli den aña 2021 cu e reglanan pa asina controla y vence e pandemia e aña aki. Considerando con e virus ta plamando cu un “positivity rate” demasiado halto, cantidad di testnan den ultimo dianan cu tawata hopi abou y awor por tuma nota cu e cantidad di testnan a aumenta, sinembargo esaki, combina cu e positivity rate halto, ta pone cu e medidanan tin cu worda prolonga. Pues e Toque de Queda ta wordo extendi cu 4 dia mas; dianan 4, 5, 6 y 7 di Januari 2021. Ta urgi comunidad henter di Aruba pa tuma nota di extension di fechanan di Toque de Queda cual ta di 11or di anochi pa 5 or di mainta riba cada un di e dianan cu a keda anuncia. E orario di ciere ta keda 10 or di anochi. Crisis Team lo sigui monitorea e desaroyo di e pandemia di serca pa tuma e pasonan necesario na tempo.