Test pa Covid-19 ta bira un poco mas facil.


ORANJESTAD, Aruba – 13 april 2020: Segun strategia estableci di Departamento di Salud Publico hunto cu Huis Artsen Vereniging Aruba (HAVA) siman pasa, a amplia e "case definition" pa cu testing di COVID-19. Esaki ta significa cu awor mas hende por test pa COVID-19. Na inisio di e crisis solamente persona cu sintoma y cu a bin di biahe of persona cu tawata tin contacto cu un persona positivo pa COVID-19 tawata por a test. Awo esey no ta e caso mas. Awo cualkier persona cu tin sintoma di entre otro:

  • Tosamento

  • Dolor di garganta

  • Perdida di holo of smak

  • Dificultad pa hala rosea

Por bin na remarke pa haci un COVID-19 test. Si bo persona tin algun di e sintomanan menciona aki riba. Tuma contacto cu e number di telefon 280.0101 pa ricibi un cita pa test. Ta haci un suplica na esnan cu ricibi un cita pa acudi na esaki riba e dia y orario stipula. E test di COVID-19 ta reacciona ora tin e virus presente den e curpa. Si un persona no tin ningun sintoma e test lo no duna un resultado confiabel. Pa e motibo aki ta haci un suplica na comunidad pa test solamente si tin un di e sintomanan ya menciona.

Si un hende of bo persona ta sinti malo, NO sali for di cas.

Pero yama bo dokter di cas pa haci un test.