Residentenan cu biaha mester ta consiente di e risico ora nan bolbe, pa evita plama e virus.


ORANJESTAD, Aruba –16 juli 2020


Cu introduccion di hopi medida di control, Aruba a logra habri su frontera un bez mas. A implementa hopi condicion pa nos bishitantenan pa evita cu nan por introduci e virus na Aruba. E condicionnan aki ta ensera cu nan mester presenta un test di Covid 19 negativo prome cu nan por move liber riba nos pais. Sea nan ta bin cu e test haci caba of nan por haci e test aki na Aruba, segun condicionan stipula di Aruba.


Loke ta e procedura y condicionan stipula pa un persona local of residente drenta bek Aruba despues di a bay di viahe ta poco diferente, esaki pa motibo cu no por nenga un local of residente di drenta su pais. E local of residente tin e opcion contrario na e exigencianan di e biahero pa bay den cuarentena pa 14 dia y no mester presenta of haci e test di Covid -19 na aeropuerto. Esaki sigur ta locual ta haci e risico pa localnan y residentenan bolbe plama e virus si nan no ta responsabel y atene nan mes na e reglanan stipula.


Departamento di Salud Publico durante e dianan cu a pasa a tuma nota cu algun local y residente ta scohe pa e opcion di bay den cuarentena pa 14 dia y no test na aeropuerto. DVG kier recorda local y residentenan cu e opcion aki tin su desbentahanan, e ta rekeri un responsabilidad grandi y tin consecuencia tambe si no cumpli.

E desbentahanan ta cu si durante e dianan di cuarentena e task forse constata cu bo persona no ta cumpli cu e condicionnan stipula, bo lo risibi un boet di minimo fl 1000,-. Durante e 14 dianan di cuarentena aki SVB no ta registra bo persona como AO y esaki nifica cu bo persona mester tuma e dianan aki como dianan di vakantie. Si durante e dianan di cuarentena bo persona realisa cu e miho opcion ta pa haci e test pa por sali di cuarentena, AZV no ta cubri e gasto di e test aki y como cu e test no lo wordo haci na aeropuerto pero na laboratorio e costo pa e test ta subi pa fl 225,-.


Departamento di Salud Publico ta haci un suplica na tur local y residentenan cu ta pensa di bay di biahe. Pa bienestar di bo mes, bo famia, nos comunidad y nos pais na momento cu bo regresa di biahe tuma e miho opcion y haci bo test di covid-19 na aeropuerto. Incorpora e $75,- di e test den bo budget di biahe, pa di e manera aki contribui na minimalisa e risico di trece y plama e virus riba nos dushi pais Aruba.

Si un hende of bo persona ta sinti malo, NO sali for di cas.

Pero yama bo dokter di cas pa haci un test.