ORANJESTAD, Aruba – 15 april 2020: Persona cu a fayece awe marduga na Paradijswijk a test positivo pa Covid-19 Departamento di Salud Publico awe mainta a wordo informa cu un persona mester a fayece na cas y cu e lo tawata tin sintoma di COVID-19. Segun protocol DVG a instrui su personal pa bay haci e investigacion necesario y a dicidi pa test e fayecido pa COVID-19. E famia a wordo instrui pa mantene nan mes den cuarentena mientras ta warda e resultado di e test. Awe tardi laat a ricibi e resultado di e test haci riba e fayecido cual ta indica positivo pa COVID-19. Conforme e protocol famia a wordo instrui inmediatamente pa nan permanece den cuarentena. Segun e mama di e fayecido dia 14 di april ainda su yiu tawata move den e bario cu e posibilidad di por a contagia otro persona cu esaki. Ta trata di un persona special cu ta move hopi den e bario y ta cuminda tur hende cu e topa. Pa es motibo aki a pidi aprobacion di e mama pa por divulga e informacion aki pa asina por juda para e contagio di COVID-19. E famia ta dunando tur cooperacion necesario pa cu esaki.
Pa medio di esaki Departamento di Salud Publico ta haci un yamada na esnan cu por a bin den contacto cu e persona aki entre *7 di april y 14 di april 2020 *pa por fabor tuma contacto cu Call Center na telefoon 280.0101.
DVG y Gobierno di Aruba ta manda palabranan di condolencia na famia di e fayecido.