Pasonan chikito y sigur mester tuma den e “Strategia di salida" di Covid-19.


ORANJESTAD, Aruba –21 april 2020 Ayera nochi nos prome Minister Evelyn Wever-Croes a informa cu Aruba ta drentando un fase nobo. Un fase unda ta bay cuminsa traha cu un “Strategia di salida" cu mester wordo desaroya y implementa pa saca Aruba for di e crisis di COVID-19. Pa Aruba sali for di e crisis ta necesario pa comercio y otro instancianan cuminsa funciona atrobe. Pero esaki mester sosode bou di condicionan cu ta reduci e riesgo pa transmicion di e virus. Na e momento aki e strategia cu Gobierno a scoge pa maneha COVID-19 na Aruba ta dunando resultado y ta importante pa sigui monitor y ahusta e strategia unda ta necesario. Ta hopi importante pa decisionan cu ta wordo tuma ta abase di datos y no abase di sentimento of presion externo. E prome paso pa saca Aruba for di e crisis aki ta encera pone nos economia interno cuminsa move. Poco poco tur instancia y negoshi ta cuminsa funciona y hendenan lo cuminsa traha bek. Esaki lo sosode den fase y cu condicionan. Di e manera aki nos ta inicia e proceso pa recupa Aruba su economia y futuro. Gobierno ta cumpli cu su tarea pa evalua cada scenario pa garantisa cu cada decision ta uno responsabel. Pero e desafio mas grandi ta nos comunidad. Nos comunidad mester tin e sentimento di responsabilidad propio pa cu cuido di nan salud na tur momento. Comunidad mester bira mas conciente di cada situacion y scenario den nan bida diario y evalua nan decisionan abase di e risico pa contrae e virus. COVID-19 lo no disparce for di e mundo aki mas y tanten cu no tin un vacuna pa e virus nos tin pa sigui biba protehando esnan mas vulnerabel pa e virus. Higiena di man lo bira un actividad frecuente y aglomeracion di hende lo mester wordo regla na tur momento cu distancia fisico di 2 meter.




Si un hende of bo persona ta sinti malo, NO sali for di cas.

Pero yama bo dokter di cas pa haci un test.