Noticia Falso ta circula.


ORANJESTAD, Aruba - 23 juni 2020


Noticia falso ta circula.


Departamento di Salud Publico a tuma nota di un rumor insistente cu ta circulando y cu no ta cuadra cu berdad.


Como e departamento cu durante e crisis aki a percura pa trese tur informacion alcaso sin sconde nada, comunidad por ta trankilo y sa cu DVG no ta sconde nada.


Pa loke ta e rumor circuando riba posibel 2 caso positivo nobo di Covid 19 cu DVG ta sconde, nos kier declara enfaticamente cu e rumor aki ta completamente falso y ta lamenta cu asta nomber y fam di personanan ta wordo menciona.


Algun dia pasa tambe a circula un otro rumor di caso positivo den hospital. Esaki tampoco tawata berdad. Hospital tin su proceduranan interno cu nan ta sigui ora un persona bin di exterior y mester wordo interna den hospital. Esaki no nifica cu e persona tin Covid-19, e persona ta wordo isola pa descarta tur otro virusnan cu ta existi.


Como un departamento responsabel, comunidad por ta trankilo cu nos ta traha pa cuida salud di henter comunidad. Cualkier situacion cu por surgi di cual por tin efecto riba salud di nos comunidad, DVG lo duna tur informacion necesario na un manera transparente y responsabel.

Si un hende of bo persona ta sinti malo, NO sali for di cas.

Pero yama bo dokter di cas pa haci un test.