Establecimentonan cu no a cumpli cu reglanan durante Halloween y mester a wordo cera

Oranjestad, 5 di November, 2020 – Taskforce Bedrijven Covid-19 cu ta encarga cu controlnan riba e reglanan pa controla e pandemia di corona virus den e sector comercial ta informa di e establecimentonan cu no a cumpli reglanan di protocol y MR ( Ministeriële regeling) y cu mester a wordo cera.


Yen Yen Bar Restaurant na Kamay 8; e musica demasiado duro, tawata tin demasiado hende den e lugar y tambe mal comportacion di DJ. E sitio a wordo cera y DJ a keda deteni.


Well Well Restaurant na Seroe Biento 3-A.; aki a constata durante control cu tabata tin demasiado hende paden y pafor, paden no tabata cumpli tampoco cu ningun di e reglanan DVG y articulonan stipula den MR.


Piccolo na Avenida Alo Tromp 7; a constata aki cu tin hende sinta na bar ta bebe y pafo tin demasiado hende na mesa. E musica tambe tabata demasiado duro y tabata tin hendenan paden sin tapaboca.


Gleny’s Corner na Avenida Alo Tromp 22-A tambe a wordo bishita pa e team di control di Taskforce Bedrijven y a constata cu e sitio tabata yen yen di hende, no tin hende na porta pa informa clientenan cu e lugar ya ta yen, no tabata cumpli cu reglanan di DVG, e distancia entre mesnan y distancia entre mesanan tampoco tabata corecto, pues a cera e lugar.


Komedo na L.G. Smith Blvd 108; e sitio aki a wordo cera ya cu nan no por a mustra ningun vergunning pa nan por tin actividad na e sitio.


Lets Chill Cafe na L.G. Smith Blvd; aki a constata cu paden tabata tin hende para na bar ta bebe, cual ta contra reglanan stipula.


Yolo Cocktails & Tapas na J.E. Irausquin Blvd 384; aki e constata cu e musica tabata hopi duro, tabata tin bailamento, cantidad di hende sin tapaboca, demasiado hende para na un mesa, seguridad di e sitio a strobe miembronan di Taskforce pa haci nan trabao.


Hoya na Havenstraat Plaza Daniel Leo; Aki a constata pa di dos dia sigui cu e musica tabata demsiado duro, Taskforce a ordena e sitio pa paga e musica completo pero a permiti e sitio keda habri.


Ta di spera cu e establecimentonan concerni y tur otro compronde cu mester cumpli cu reglanan di Protocol di DVG y e articulonan stipula den e MR pa asina nan proteha nan mesun clientenan y pueblo di Aruba engeneral.

Si un hende of bo persona ta sinti malo, NO sali for di cas.

Pero yama bo dokter di cas pa haci un test.