E realidad di COVID-19.


ORANJESTAD, Aruba – 27 maart 2020: For di december 2019 cu Corona Virus COVID-19 a introduci su mes na Wuhan China, te cu awe maart 2020 un totaal di 26.935 mil hende a muri pa motibo di COVID-19.  For di januari 2020 Departamento di Salud Publico a cuminsa duna informacion na comunidad riba e virus di COVID-19 y con pa proteha nos mes di esaki. Na luna di maart pa ser exacto 13 di maart 2020 Aruba a sera conoci cu su prome caso y despues di esey e cifrasnan solamente a keda subi. Apesar di tur informacion duna na comunidad di parti DVG y tur medida tuma pa Gobierno pa evita cu e virus sigui plama, si e hende no tuma su responsabilidad y cambia su comportacion; hopi hende lo por bay muri. E ta e tristo realidad cu COVID-19 ta e causa di hopi morto rond di mundo y Aruba lo no ta un excepcion si comunidad no tuma COVID-19 na serio y cuminsa aplica distancia social, distancia fisico y keda na cas lo mas posibel. Na e momento aki e mortalidad di COVID-19 rond mundo ta 3.4%. Esaki ta nifica cu di cada 100 hende infecta 3 hende lo muri.


Y esaki ta e realidad cu Aruba tambe lo tin cu enfrenta si como comunidad nos no actua awor y keda cas.



Si un hende of bo persona ta sinti malo, NO sali for di cas.

Pero yama bo dokter di cas pa haci un test.