E lucha contra Covid-19 no a caba Aruba mester ta Uni pa Preveni y Evita di Plam’e


ORANJESTAD, Aruba –02 mei 2020 For di dia 13 di maart cu e prome caso di COVID-19 a keda registra na nos isla, como Departamento di Salud Publico di Aruba un di nos tareanan tawata pa educa comunidad miho posibel riba con ta preveni di haya e virus y evita cu e ta si sigui plama. Esaki nos a haci door di mantene un comunicacion dinamico transparente y riba base diario cu comunidad. Danki na esfuerso di un y tur nos por bisa cu a logra mantene e transmision di e virus te cu awor na un nivel manehabel pa pais Aruba, pero e peliger no a pasa ainda e lucha ta sigui. Awor cu poco poco ta bay cuminsa laga comunidad bolbe bek na trabou ta hopi importante pa cada uno di nos sigui aplica tur loke nos a siña den e “Normal Nobo”. E virus di COVID-19 no a desaparece, e por parse manera cu ela bay pa un rato y despues e por tey atrobe. Nos mester adapta nos forma di biba pa ta conciente y proteha nos mes pa no hay’e y si hay’e mes pa nos no sigui plam’e. Pesey mes ta nesesario pa cada uno di nos aplica tur medida basico di prevencion cu nos a siña durante di e ultimo simannan. • Sea conciente di bo accion y su peliger pa cu bo salud y di bo famia • Si bo ta malo no bay den publico pero consulta cu bo Dr di cas tocante bo sintomanan. • Evita bay unda tin aglomeracion di hopi hende • Mantene distancia fisico di 2 meter for di otro persona • Evita mishi cu wowo, nanishi y boca • Evita mishi cu hopi articulo of superficie cu bo man • Ora di saluda, no suchi, brasa of boeks • Laba man frecuentemente cu awa y habon of uza handsanitizer cu 60% di alcohol. Esakinan ta algun conseho basico cu Departamento di Salud Publico ta recomenda pa reduci e transmicion di e virus. Si cada uno di nos cu ta biba riba e dushi pida baranca aki cu yama Aruba, sigui e consehonan menciona nos lo por sigui maneha e cantidad di casonan na Aruba riba un minimo. E meta principal ta pa detecta un caso trempan, test, diagnostica, isola y identifica tur esnan cu tawata tin contacto cu e caso. Pa logra esaki Aruba mester di nos tur.




Si un hende of bo persona ta sinti malo, NO sali for di cas.

Pero yama bo dokter di cas pa haci un test.