ORANJESTAD, Aruba – 4 april 2020: Departamento di Salud Publico ta clarifica. Awe diasabra 4 di april ta circula atravez di rednan sociaal y whattsap un situacion cu a surgi na Savaneta. Pa loke ta e rumornan circulando cu Savaneta completo ta infecta y cu ta trata di 5 cas y mas cu 40 persona contagia ta completamente falso. Pa loke ta e caso enparticular DVG tin e obligacion pa ley pa proteha privacidad di cada un pashent. Loke nos por informa ta cu e caso y situacion ta conosi serca nos y a wordo atendi segun protocolnan estableci; esey kiermeen cu tur medidanan di proteccion mescos cu tur otro caso a ser tuma y esnan cu tabata tin contacto cu e persona aki ta den cuarentena. Mientrastanto na un supermercado awe a topa fila di hende para serca di otro parti pafor y aki autoridadnan mester a hala atencion di e gerencia y di e clientenan mes para pafor. Nos mester bisa Taskforce y Autoridad Policial ta trahando, sinembargo ta spera mihor cooperacion pa proteccion di boso mes y di boso famia. Y pa loke ta social media nos kier pidi comunidad pa sigui e conferencianan di prensa 2 x pa dia di Gobierno y DVG pa sa kiko ta berdad. Final nos kier conseha tur hende ta pa ta prudente y consciente, keda cas mas tanto posibel pa proteccion di bo mes y bo famia.