Crisis Team ta condena publicacion di informacion priva.

Keho a keda entrega - investigacion a cuminsa.

Oranjestad, Aruba - 23 augustus 2020 Team di maneho di Crisis Covid-19 a tuma nota di echo cu un lista di nomber di pashentnan a ser poni den circulacion riba medionan social. Esaki ta un violacion hopi serio di etica di trabao y di e principionan mas importante den maneho di salubridad.

Desde inicio di e crisis di Covid-19 te cu awe; Crisis Team, DVG y Hospital ta atendiendo cu e Crisis y e data di e casonan di Covid-19 den un circulo hopi chikito pa hustamente proteha e informacion priva di cada pashent. Tur nos profesionalnan ta dunando e maximo di nan mes, poniendo nan mesun salud y bida na riesgo pa yuda y brinda e mihor cuido posibel na tur nos pashentnan. Pesey e echo aki di publica lista di informacion priva di patientnan ta un echo sumamente grave y condenabel cu na e momentonan aki ta wordo atendi cu ne por medio di un keho cu a keda entrega y un investigacion cu a cuminsa.

Team di Crisis di gobierno ta suplica cualkier persona cu por a haya e lista aki pa deshaci di esaki y no sigui pase rond pasobra cu e ta un echo castigabel. Mientrastanto extra pasonan a wordo tuma pa preveni cu algo asina por bolbe sosode den futuro. Autoridadnan ta vigilando e situacion aki di serca

Si un hende of bo persona ta sinti malo, NO sali for di cas.

Pero yama bo dokter di cas pa haci un test.