Casonan di Covid-19 ta sigui aumenta

Esnan cu ta positivo of den cuarentena mester sigui tur instruccion.

ORANJESTAD, Aruba – 06 augustus 2020


Manera cu a anticipa, despues di e brote den sitionan publico, e casonan positivo di Covid-19 ta sigui aumenta.


Awe 6 di augustus Aruba ta regista un total di 92 caso nobo di transmision local, 2 persona mas a recupera, un total di 703 test a wordo haci y total di casonan activo a bira 146. Nos yamada ta bay na esnan cu a test positivo y tambe esnan cu a wordo manda den cuarentena pa DVG; pa cumpli debidamente cu tur e instruccion cu a ser duna. Isola bo mes for di famia, amistadnan y publico pa e periodo cu bo permanece positivo y tuma tur e tempo cu mester pa recupera bo salud.


Na esnan cu ta pensa cu nan por tawata na risico y no tin sintoma ainda, ta recomenda bo pa bisti un mondmasker tur caminda cu bo bay, apesar cu bo no tin sintoma na e momentonan aki. E sintomanan por presenta ainda den e dianan of simannan venidero.


Gobierno di Aruba a implementa un bez mas diferente medida cu ya ta conoci pa yuda stop e virus su transmision atrobe. E medidanan aki ta ensera;

  • Ciere di bar, night club y rumshop

  • No por organisa fiesta na cas

  • Mondmasker ta obligatorio den transporte publico y den establesimentonan

  • Casnan di cuido di nos grandinan ta stop di risibi bishita.

E medidanan aki ta nesesario pa yuda stop e transmision di Covid-19 na Aruba. E medidanan aki y tambe e control riba esnan den cuarentena y isolacion lo wordo reinforsa. Task force lo ta controlando y multa lo wordo duna na es cu no ta cumpli cu orden di isolacion y cuarentena.


Recientemente nos a logra esaki, awor ta momento pa ripiti e actitud cu diciplina pa hunto nos logra.

Si un hende of bo persona ta sinti malo, NO sali for di cas.

Pero yama bo dokter di cas pa haci un test.