Cambionan di maneho pa reduci transmision di COVID-19

Crisis Team ta informa

ORANJESTAD, Aruba –26 maart 2021 Aruba ta experenciando aumento drastico den casonan di COVID-19 un bes mas. E casonan cu recientemente ta keda registra ta reparti rond Aruba y den diferente categoria di edad. Nos hospital na e momento aki a bati alarma, informando cu e capasidad pa cuido intensivo ta birando limita.


Ta di gran importancia pa frena e transmision di e virus mas pronto posibel pa evita un brote mas grandi y pa por haci esaki, medidanan extra mester wordo tuma pa cu e diferente categorianan di edad unda e risico di transmision ta mas grandi. Pa e motibo aki cu e siguiente medidanan lo drenta na vigor entrante 27 di maart 2021 te cu 11 april 2021 y prome cu e fecha aki lo evalua si e medidanan ta dunando efecto of si mester ahusta.


  • Toque de Queda su orario ta bira di 10:00 pm pa 5:00 am y orario di ciere ta bira 9:00 pm

  • Tur scol lo sera 3 dia prome cu vakantie cuminsando dialuna 29 di maart, cu exepcion pa e alumnonan cu ta den examen, CP of toetsweek e alumnonan aki ta bay scol pa haci esakinan.

  • Gym/ localidad di ehercicio no por ta habri.

  • Supermercado y hardware stores mester limita clientela cu 50%. Esaki mester wordo haci door di pone menos garoshi y macuto.

  • Campamento no por sigui.

  • Programa pa mucha durante vakantie di scol of cualkier actividad pa mucha di scol no ta permiti. Cresh lo por keda habri.

  • Evento di drive by ‘celebracion’ of cualkier drive thru cu meta ta uno social mester wordo cansela y no por wordo organisa.

  • Establesimentonan cu bar/restaurant verguning por duna servicio na maximo 4 persona na mesa paden y pafo. No ta importa si ta famia of amistad. Maximo di persona na mesa ta 4, mucha bou 12 aña no ta wordo conta na mesa.


RECORDATORIO

  • Actividad social/ familiar na cas sea paden of pafo ta wordo altamente desconseha.

  • Bishita di famia na cas pa atende cu cuido general, cuido medico of emocional ta un nesesidad permisibel. Ehempel di esakinan ta hiba remedi, cuminda of duna atencion social na un mayor of familiar cu por ta biba su so of ta depende di cuido di un otro. Minimalisa contacto directo y uza tur medida di proteccion manera tapa boca y un bon higiena di man. Tambe limita e cantidad di persona pa bishita.

  • Entretenimiento musical por tuma lugar unicamente cu 1 presentador of musico. Ta conseha musiconan pa mantene e musica abou pa evita cu clientenan tin pa forsa pa papia of grita na momento di comunica cu otro.

  • Bar y rumshop ta permanese sera

  • Entiero/ Funeraria por tuma lugar cu maximo 10 persona.

  • Prohibicion di uzo di alcohol of e intencion di uzo di alcohol riba caminda of espacio publico ta sigui vigente

  • Samenscholing ta keda maximo 2 persona riba caminda of espacio publico

  • Gebiedsverbod riba tereno publico manera parkeerplaats of canto di caminda ta sigui na vigor


Cu anuncio di e cambionan aki riba mensiona, Crisis Team ta spera di por yuda comunidad den reduci e plamamento di e virus. Ta importante pa hunto cu tur e medidanan nos sigui mantene y eherce e medidanan di proteccion basico cu ta laba man frecuentemente, bistimento di tapa boca corectamente, mantene distancia fisico di 1.5 meter y evita espacionan unda tin aglomeracion di hende. Tur demas medida ya menciona anteriormente ta keda na vigor tambe.