ORANJESTAD, Aruba –05 juli 2020: Veterinaire Dienst cu ta un servicio di Departamento di Salud Publico ta e seccion cu ta supervisa leynan cu ta relata na salud di animalnan. Veterinaire dienst ta traha cu diferente ley pa proteha nos comunidad di “zoonosis” cu ta malesanan transmiti di bestia pa hende manera rabies y covid-19, pa proteha nos fauna indemico y nos animalnan di malesanan infeccioso di bestia manera parvo y schroefworm. Veterinaire Dienst ta traha hunto cu Douane pa supervisa e ley di importacon di animal y pa salvaguardia salud di comunidad henter.
Na momento cu un persona tin pensa di biaha cu su mascota, ta deber di e persona pa di antemano revisa e condicionan rekeri na e instancia oficial di e pais na unda nan kier bai di biahe, pasobra cada pais tin nan leynan y condicionan.
Na Aruba ley ta stipula pa añas caba cu ta prohibi di bin cu cacho for di Sur- y Midden America incluyendo Mexico, St. Domingo, Haiti y Cuba.
Recientemente a sali den publicidad un caso unda un cacho illegalmente a wordo importa for di Colombia y atravez di medio di comunicacion kier hunga cu sentimento di comunidad pa di e manera aki purba obliga Veterinaire Dienst pa kibra ley, esaki sigur ta algo di lamenta profundo. E ley ta bisa cu no por importa cachonan for di e paisnan menciona.
Pa loke ta e caso particular aki ta asina cu 2 siman pasa a trata di drenta Aruba illegalmente cu e cacho. Douane cumpliendo cu ley no a permiti e cacho drenta Aruba y a splica corectamente na e doño e motibo di esaki. Den casonan asina unda ta purba importa animalnan illegal, normalmente ta purba di manda e animalnan bek nan pais riba e mesun buelo, pero esaki no a logra y douane a tuma contacto cu Veterinaire Dienst pa tuma e animal over. Desde e dia aki e cacho ta den quarentena manera stipula pa ley pa asina duna e doño chens pa regla pa e bestia bai bek. Lamentablemente e donjo no a usa e tempo aki pa busca solucion pa manda e cacho bek.
Den nos leynan e unico excepcion pa cu un famia por bin cu su mascota Aruba si e ta encera un verhuizing. Pa cu esaki tin condicionan hopi estricto y e cacho mester ta un miembro di famia, es decir e mester por a biba cu e famia mas cu 6 luna. Contrario na declaracion di e doño di e cacho, Douane y Veterinaire Dienst a constata cu e doño y e cacho no ta cumpli cu e exigencianan pa wordo permiti na Aruba. E cacho no tin tur e vacunanan y testnan nesesario, e cacho no por wordo considera un inboedel pa motibo cu pa un animal wordo considera un inboedel prosedente di Zuid America tin un proseso estricto y largo cu e cacho tin pa cumpli cu ne pa descarta tur malesa infeccioso y banda di esaki e cacho ta prosedente di un pais unda importacion ta estrictamente prohibi y esaki e persona tawata na altura di dje manera e mes a declara.
Casonan manera esaki ta sosode cu frecuencia y Veterinaire Dienst ta cumpli cu ley manera cu esaki ta indica. Veterinaire Diensta ta lamenta un bes mas cu kier trata na trapa riba nos leynan door di bay den publicidad. Leynan tey y nos tin pa traha y cumpli cu nan y Minister of Gobierno no por kibra esakinan.
Veterinaire Dienst ta haci su trabou pa vigila cu ningun animal ta drenta Aruba illegalmente cu e risico di por causa un brote of epidemia di malesanan infeccioso di animal aki na Aruba.
E cacho encuestion mester wordo manda bek pa Colombia pa asina evita cu lo mester pone drumi. E decision a wordo tuma cu e cacho lo tin cu bai bek. Ta e deber di e doño pa zorg pa esaki y e ta haya e espacio aki tambe. Nos ta lamenta cu e persona no a informa su mes promer cu e la importa e cacho y despues no kier respeta e reglanan y leynan vigente. Ley ta pa tur hende cumpli y e ley aki no ta permiti ningun gobernante pa haci excepcion riba dje.
Nos ta spera cu comunidad henter por compronde esaki.