ORANJESTAD, Aruba – 03 augustus 2020
Aruba ta registra awe cinco caso di Covid 19 transmision local. Cu transmision local ta ser referi cu e persona no tin un historia di biahe y a contrae e virus aki na Aruba.
Na e momentonan aki e team investigativo ta haciendo nan investigacion y “contact tracing” pa purba saca afo ken tur por tawata tin contacto cu e personanan cu a keda infecta, con e transmision a tuma luga y na unda.
Cu registracion di e cinco casonan aki di transmision local, Crisis Team ta eleva nan medidanan segun plan di maneho y contingencia di e virus.
E elevacion ta nifica cu desde awe 3 di augustus ”mondmasker” lo bira un recomendacion fuerte di uzo tur caminda y bou tur circunstancia unda cu no por cumpli cu distanciamento fisico di 1.5 meter y tampoco no tin un barera fisico manera glas of flexiglass memei pa recompensa e distancia menos di 1.5 meter. E medida di proteccion aki ta conta den tur situacio y pa tur localidadnan cu ta duna servicio paden y pafo den aire liber.
Casnan di cuido di nos grandinan, servicionan religioso, ceremonia di entiero, gym y tur organisacion mester reinforsa nan protocolnan y implementa esakinan estriktamente. Medidanan extra cu lo bin na vigor entrante mañan 04 di augustus ta ensera.
Mesanan den restaurantnan no por tin mas cu 4 persona, excluyendo mucha bou 12 aña.
Bar (toonbank) den localidadnan no por duna servicio, dus no por tin stul na e bar pa sinta.
No por tin actividad musical sea live of DJ
Deporte interior den grupo mester para
Deporte interior di contacto mester para
Deporte di contacto outdoor mester para
Samenscholing verbod ta bin na vigor bek,unda no mas cu 4 persona por ta hunto riba tereno publico.
Awor cu transmision local a keda registra bek na Aruba, comunidad mester ta mas conciente di nan propio proteccion. E metodonan di proteccion ta sigui ta vigente y ta introduci mond masker pa preveni cu e virus por sigui plama. DVG y Gobierno ta urgi un y tur pa practica e reglanan cu hopi disiplina pa hunto nos logra un bez mas di controla e virus su transmision local.
· Laba man cu awa y habon frecuentemante of uza handsanitizer
· Evita mishi cu wowo, nanishi y boca.
· Mantene distancia fisico di 1.5 meter y unda no por cumpli uza un mondmasker
· Si bo tin sintoma, yama bo docter di cas pa por haci un test.