Aruba ta cuminsa duna “Boostershot” di Pfizer

ORANJESTAD, Aruba –20 november 2021: Aruba recientemente a haya ‘green light’ pa cuminsa suministra e ‘boostershot’ di Pfizer bou di e categorianan di edad 60+ y tambe na esnan cu ta traha den sector di cuido y cu tin contacto directo cu pashent. Ta importante pa e adulto mayor di 60 aña ricibi e ‘boostershot’ debi cu e proteccion despues di e di 2 shot di Pfizer ta un tiki menos serca e adulto mayor di 60 aña, compara cu cerca esnan di edad mas jong. E vacuna cu ta bay wordo usa como ‘boostershot’ ta e mesun vacuna di Pfizer cu a wordo uza pa prome y di dos dosis y locual kier logra cu aplicacion di e ‘boostershot’ ta aumenta e efecto di e prome serie di vacuna ya ricibi.


Pa maneha e fluho di persona na e miho forma posibel teniendo na cuenta cu tur protocol di COVID ta importante pa comunidad ta informa cu lo dividi e categoria di edadnan como lo siguiente. E prome grupo cu lo wordo vacuna ta esnan di 80+ despues lo sigui cu 70+ y por ultimo 60+. Den transcurso di otro siman Aruba lo ta ricibiendo un bez mas otro cargacion di vacuna for di Hulanda pa cual motibo nos lo tin vacuna suficiente.


Rekisitonan pa por ricibi e ‘boostershot ’:

• Pa ricibi e ‘boostershot’ e persona mester tin 60 aña of mas of mester ta traha den sector di cuido unda cu e tin contacto cu pashent.

• Pa ricibi e ‘boostershot’ e persona mester a ricibi su di 2 dosis di Pfizer of su prome dosis di Johnson & Johnson mas cu 6 luna pasa.

• E ‘boostershot’ lo wordo aplica unicamente cu afspraak dus NO por 'walk in'. DVG lo usa e Aruba Health app pa manda un invitacion via e-mail of lo yama telefonicamente esnan cu no tin un e-mail adres.

Na e momento aki no tin motibo medico pa duna ‘boostershot’ na ciudadanonan bou di 60 aña cu excepcion di esnan cu tin un sistema inmunologio comprometi cu por haya esaki cu un verwijsbrief di nan specialista. Probablemente den futuro, esnan bou di 60 aña cu ta desea un ‘boostershot’, lo por hay'e tambe nos lo mantene comunidad informa. DVG ta sigui stimula tur persona di 12 aña bay ariba cu no a vacuna ainda pa pasa busca esaki na edificio di DVG. Pa mas informacion por yama 280.0101 of 5224200.