Aruba ta cla pa habri cu Merca




Aruba ta cla pa habri cu Merca

cu extra medidanan di control y capacidad di ICU na Hospital normalisa.



Oranjestad, Aruba - 8 di juli, 2020

Minister di Salubridad Publico y Deporte Sr. Dangui Oduber a participa na comunidad di Aruba ayera nochi durante e conferencia di prensa di Gobierno, cu tur preparacion a keda cla pa reaperutra di frontera cu Merca diabierna awor 10 di juli.

Manera ya a informa, un strategia di proceduranan cu extra medida di control ta na vigor pa e estadonan cu mas riesgo di Merca pa asina reduci e riesgonan pa Aruba mas tanto posibel. Desde cu a habri frontera pa Europa, Canada y parti di Caribe, tur e departamento y instancianan concerni ta trahando duro cu hopi dedicacion na nos Aeropuerto.

Diabierna lo yega 700 pasahero for di Merca, diasabra 1400 pasahero y diadomingo 700. Antes Aruba ta ricibi alrededor di 20 mil turista Americano pa siman, sinembargo e biaha aki lo ta apenas 2800 turista lo yega durante e promer siman. Aruba a escoge conscientemente pa seguridad y no cantidad, pa asina gradualmente cu un bon maneho nos por logra controla e riesgonan pa nos pais y su poblacion.

Taskforcenan di Gobierno tambe ta cla pa asumi nan tarea di controla negoshinan y tur otro instancia cu tin cu cumpli cu protocol.

E situacion na Hospital a keda resolvi, Aruba su capacidad di Intensive Care entrante diadomingo awor lo bek normal, igual cu e capacidad promer cu e candela di dia 16 di juni ultimo. Testnan a ser haci na Hospital pa controla e calidad di aire y tur a sali bon. E mudamento di e equipo lo tuma lugar den siman y weekend y pa diadomingo tur cos lo ta cla. “Mi ta gradici tur e trahadornan di e departamentonan tanto di Hospital, Gobierno como di e contratistanan y tur otro instancianan technico cu ta yudando nos. Aruba ta para dilanti retonan hopi grandi, sinembargo cu cooperacion di tur hende hunto nos lo logra habri nos fronteranan, maneha e virus na bon manera y recupera nos economia y futuro.” Tabata palabranan di Minister Dangui Oduber clausurando e conferencia di prensa.

Si un hende of bo persona ta sinti malo, NO sali for di cas.

Pero yama bo dokter di cas pa haci un test.