ORANJESTAD, Aruba - 15 di april 2020
Manera cu Departamento di Salud Publico y Gobierno a anuncia anteriormente. Aruba lo no ta un excepcion pa COVID-19. Rond mundo un averahe di 6% di esnan cu COVID-19 a fayece pa motibo di complicacion. Awe 15 di april lamentablemente nos tin pa informa cu Aruba ta conoce su prome morto. Ta trata di un sra di 79 aña cu tawata interna den hospital pa algun dia caba pa motibo di COVID-19. Apesar di tur esfuerso haci lamentablemente e persona no a recupera. Departamento di Salud Publico y Gobierno ta keda enfatisa cu test di COVID-19 ta gratis y tur persona cu tin sintoma respiratorio mester yama e number di telefon 280.0101 pa haci un test. Mas trempan diagnostica un persona, mas lihe por stop e virus di sigui plama. Pa test por yama tur dia entre 7 am cu 11 pm si tin sintoma di tosamento, dolor di garganta, problema pa hala rosea of perdida di smaak of holo.