ORANJESTAD, Aruba – 28 mei 2020
Departamento di Salud Publico DVG Y Gobierno di Aruba awe tardi a ricibi e informacion cu e ultimo persona cu tawata interna den ICU cu e virus di COVID-19 a test negativo. Esaki nifica cu e persona no tin e virus activo mas den su sistema y awor ta recuperando den Dr. Horacio Oduber Hospital.
Esaki ta haci cu nos cifras di persona recupera ta aumenta na 98 y caso activo di COVID-19 ta na e momento aki 0.
Departamento di Salud Publico y Gobierno di Aruba ta desea di felicita e Crisis Team completo pa nan aporte y consehonan brinda cu a yuda Gobierno den tuma e miho desicionnan. Tambe un palabra di danki ta bay na tur esnan cu a traha den prome linea (frontliners) y na comunidad completo cu a pone nan confiansa den e capacidad di nos profesionalnan y a sigui tur conseho y instruccion duna.
Pa nos sigui logra nos mester sigui aplica tur e medidanan di prevencion manera DVG ta recomenda. Distanciamento fisico-social, laba man y si bo tin sintoma keda cas y consulta cu bo dokter di cas.
Un biaha mas pabien pueblo di Aruba pa e gran diciplina y solidaridad demostra durante tur e simannan cu a transcuri, Uni nos ta Vence!