E Periodo Meimei Di E Prome y E Di Dos Vacuna Ta Bira Entre 3 Te Cu 6 siman.


Oranjestad, 01 april 2021

Entrante dialuna 5 di april, e protocol di interval entre e promer y di dos vacuna contra COVID19 lo cambia na Aruba. E periodo entre e prome y di dos vacuna ta bay cambia di 3 siman, pa entre 3 te cu 6 siman. Esaki ta conta pa tur persona di tur edad cu lo haña e prome vacuna desde april.


A base di conbersacion entre DVG y RIVM di Hulanda y considerando e hecho cu tur esnan riba 60 anja cu a registra a haya 2 shot caba y ta bon protehi a wordo dicidi adapta e periodo entre e prome y di dos aplicacion di e vacuna entre 3 te cu maximo di 6 siman.


Teniendo cuenta cu nos hospital ta yen, e contagionan ta subiendo hopi liher, esnan riba 60 anja cu a registra a haya 2 shot caba y nos ta ricibiendo mas vacuna, Aruba lo bay over na duna e di dos vacuna algun siman mas laat compara cu e 3 siman exacto. Analysis a mustra cu e efectividad di e vacuna di Pfizer ta keda hopi halto si e di dos shot lo wordo duna despues di tres siman, pero prome di 6 siman.


Den comienso di e campaña di vacunacion, DVG a duna prioridad pa vacuna mas lihe posibel e gruponan mas vunerabel di 60+ y tambe personal trahando den cuido. Esaki tabata e motibo pa duna e di dos shot di biaha despues di 3 siman di e prome shot. Mirando e candidad di caso positivo nobo pa dia na Aruba, e gran candidad di caso activo y e presion riba Hospital, a dicidi di haci e maximo esfuerzo pa vacuna mas hende posibel cu e prome shot.


E maneho nobo aki lo zorg pa e programma di vacunacion di Aruba lo ta aun mas efectivo, door di vacuna mas persona 18+ na Aruba, mas lihe cu e prome shot. Cu esaki, DVG por cuminsa pa vacuna tur grupo di meta di 18+, incluiendo e grupo di persona cu no tin un riesgo medico. E ultimo grupo aki di esnan 18+ sin condicion di salud lo hanja afspraak a base di edad mas avanza, biniendo abou por ehempel lo cuminsa cu edad di 50 despues 40 y sigui bin abou den edad.

Nos a dicidi cu nos lo aumenta nos tambe nos capacidad di vacuna pa dia y lo bai habri un otro localidad. Nos lo informa comunidad debidamente di esaki dentro di poco.