Ken ta hasi e investigacion?

Departamento Salud Publico Aruba (DVG) ta hasi e investigacion. Durante e investigacion, DVG lo colecta informacion di anticurpa den sanger di hende. Esaki lo yuda nos compronde mas tocante proteccion contra e virus y tambe propagacion di e virus den nos poblacion. E proyecto ta wordo conhuntamente hasi cu LabHOH. Participantenan lo pasa cerca di un prikpost di LabHOH caminda e muestra di sanger lo wordo investiga pa den laboratorium.

Participacion na e estudio ta boluntario?

Si, participacion na e estudio ta boluntario. Si bo persona kier participa, nos lo mester consentimento riba papel. Prome cu bo dicidi, ta importante pa bo sa kiko e estudio ta encera. Tuma bo tempo pa lesa e informacion riba e pagina aki. Si bo persona tin cualke pregunta, tuma contacto cu nos. Linea directo Directie Volksgezondheid Tel: +297 5224200 Email: directie@despa.gov.aw Dialuna te cu diabierna di 8:00 pa 16:00. (no riba dianan di fiesta) Menciona cu bo ta participa na e estudio di seroprevalencia. Callcenter Tel: +297 2800101 Email: callcenterdvg@gmail.com Dialuna te cu diabierna di 8:00 pa 16:00. Menciona cu bo ta participa na e estudio di seroprevalencia.

Ken por participa den e estudio?

Door di un ‘steekproef’ of seleccion di un grupo den nos poblacion, 4578 adres a wordo selecta pa participa na e estudio via un carta cu ta wordo manda na nan cas. Pasobra e estudio ta anonimo, no tin nomber ni fam menciona riba e carta. Pero solamente adres y categoria di e edad. Ken cu haya e carta di invitacion por participa den e estudio si nan ta den e categoria di edad menciona. Por ta cu bo persona ya a wordo infecta cu Covid-19. Asina mes, nos ta puntra pa participa na e estudio. E ta importante cu nos ta haya un grupo di participante cu ta representa nos poblacion.

Kico ta e meta di e estudio?

Proposito di e investigacion ta pa obtene informacion tocante propagacion di e coronavirus nobo den poblacion di Aruba. Na momento cu un persona ta infecta cu e virus, su sistema di inmunidad ta crea anticurpa pa combati e virus. E anticurpanan aki por wordo detecta den sanger di e persona. Esaki ta rekeri un muestra di sanger. DVG lo examina sanger di mas of menos 1.000 persona di diferente edad, cu ta biba na diferente parti di Aruba. E deteccion di anticurpa den sanger lo presenta informacion importante tocante e plamamento di e virus y posibel adkisicion di inmunidad di grupo.

Kico ta SARS-CoV-2 y COVID-19?

Den december 2019 a surgi un brote di un coronavirus nobo na China. E nomber di e virus aki ta SARS-CoV-2. E virus por causa e enfermedad COVID-19. Personanan infecta cu e virus frecuentemente ta sufri di keintura y problema respiratorio. Mayoria di pashent ta haya sintomanan leve, pero tin hende cu por bira gravemente enfermo. Na Aruba, e prome dos pashentnan infecta cu e virus a wordo raporta 13 di maart 2020. Ainda hopi informacion/datos ta desconoci di e coronavirus nobo aki. Pa obtene mas informacion di e virus y e curso di e enfermedad, investigacion cientifico ta necesario. Entre otro, e forma di propagacion di e virus y adkisicion di inmunidad di grupo.

Kico mi mester hasi si mi tin sintomanan relaciona cu Covid-19?

Si bo tin sintomanan relaciona cu Covid-19 bo ta wordo puntra pa tuma contacto cu bo dokter di cas pa asina hasi un test (swab) pa haya sa si actualmente bo ta malo cu Covid-19. Si no ta logra tuma contacto cu dokter di cas, bo ta wordo pidi pa yama callcenter na 280 0101.

Kico ta spera di mi si mi participa?

Si bo persona ta participa, nos ta pidi bo pa yena un cuestionario y pa laga nos tuma un muestra di sanger. Por completa e cuestionario digitalmente of via telefon. • Ta yena e cuestionario digitalmente via e aplicacion Aruba Health App y ta dura mas o menos 10 minuut. Si esaki ta resulta dificil, un miembro di famia of conoci por duna asistencia. • E otro opcion ta contesta e cuestionario via telefon. Un empleado di e callcenter lo duna asistencia. Esaki por dura mas o menos 30 minuut. Si tin algun pregunta adicional tocante e investigacion por tuma contacto cu callcenter via number 280-0101 di DVG of por manda e pregunta via mail na callcenterdvg@gmail.com. Si bo persona no kier participa na e investigacion mas, ta importante pa bo tuma contacto cu Departamento di Salud Publico (consulta Appendix A pa obtene informacion di contacto).

Posibel bentaha y desbentaha?

Bo participacion ta yuda pa amplia e conocemento di e coronavirus nobo y e malesa di COVID-19. Ta sumamente importante pa por tuma den consideracion tur e bentaha y e posibel desbentahanan prome cu bo tuma e decision pa participa. Un bentaha pa participa na e test aki ta cu bo lo haya sa si bo a yega di infecta cu SARS-CoV-2. Bo lo ricibi resultado di e analisis di sanger denter di algun dia via e aplicacion digital Aruba Health App of via un yamada telefonico. Si resulta cu bo tin anticurpa den bo sanger ta indica cu bo a wordo infecta cu SARS-CoV-2. Te cu awor no ta conoci ki tipo di defensa anticurpa contra SARS-CoV-2 por crea. Posibel desbentaha di participacion na e estudio aki ta:

• E ta costa bo tempo
• Dolor
• Bo por sinti incomodo durante tumamento di sanger.

Kico ta e proceso di tuma sanger?

Ora di yena e encuesta, na final bo persona mes lo por scohe lugar, fecha y ora pa tuma sanger. Ora di tuma e muestra di sanger, 2 muestra lo wordo tuma for di ader parti paden di e elleboog. Por sinti dolor durante hincamento di e hangua. Aki nos ta papia di cantidad masha chikito di sanger y bo curpa lo no tin ningun molester di esaki.

Si bo no kier participa of kier stop cu e investigacion

Participacion na e investigacion ta voluntario. Si bo ta desea di no participa, no mester haci nada y por descarta e peticion. Si bo kier participa na e investigacion por pasa cu bo ta haya duda y kier stop por fabor tuma contacto cu nos na callcenter na 280 0101. Den e caso aki lo uza e informacion adkiri te cu momento cu bo dicidi di stop cu e investigacion. Si bo ta desea, e material acumula por wordo destrui. Si tin informacion nobo cu ta sali for di e investigacion aki e investigado lo informa bo di esaki.

Ki ora mi participacion den e estudio ta termina?

Bo participacion den e investigacion aki ta finalisa na momento cu:

• Bo ta dicidi di stop
• E investigado ta haya cu ta miho pa bo mes pa stop
• Departamento di Salud Publico of e Hunta di Revision medico-etico dicidi cu ta finalisa e investigacion.

Uzo y wardamento di informacion personal y material biologico, con ta para cu esaki?

Pa e investigacion aki lo colecta informacion di bo persona. Aki nos ta papia di informacion manera bo number di telefon, adres, fecha di nacemento y informacion tocante bo estado di salud. Pa e estudio aki lo tuma muestra biologico di bo persona cu den e caso aki lo ta bo sanger. E coleccion, analisis y wardamento di bo informacion ta necesario pa por contesta e preguntanan di e investigacion aki y pa por publica e resultadonan di e investigacion.

Investigacion den futuro

Si no ta desea pa hasi esaki , bo persona por participa tambe solamente na e investigacion di COVID-19. E estudio aki su proposito ta pa investiga anticurpa contra covid-19 den sanger. Tambe nos lo puntra bo persona si nos por warda bo muestra di sanger pa por hasi mas investigacion den futuro. E motibo pa warda e muestra di sanger di bo persona ta pa por mira si tin anticurpa contra otro malesanan contagioso den futuro. Aki ta trata di malesanan contagioso cu ta wordo transmiti pa medio di pica di sangura(1) y otro malesanan contagioso(2) contra cua ta wordo vacuna den e programa di vacunacion. Bo persona por participa na e investigacion di COVID-19 sin cu tin mester duna permiso pa haci e investigacion riba otro malesanan contagioso.

1. Dengue, zika, chikungunya, gele koorts y malaria
2. Difterie, Kinkhoest, Tetanus, Polio, Bof, Mazelen, Rode Hond, Hepatitis B, Haemophilus influenzae type B, Pneumokokken, Humaan papillomavirus.

Pa cuanto tempo lo warda mi datonan

Si bo duna bo permiso, lo warda bo datonan y e muestra di bo material biologico pa un maximo di 10 aña despues cu a finalisa e investigacion y cu bo persona a duna permiso pa esaki den e formulario di consentimento.Bo persona por participa na e investigacion di COVID-19 sin cu tin mester duna permiso pa haci e investigacion riba otro malesanan contagioso. Den e caso aki bo muestra di sanger lo wordo destrui na final di e investigacion

Anula e permiso di consentimento?

Bo lo por cambia di decision pa consentimento di uzo di bo informacionan personal y sanger na tur momento. Esaki ta conta no solamente pa e investigacion pero tambe pa e coleccion y wardamento di bo informacion pa estudio den futuro. E informacion ta wordo uza te na e momento cu bo revoca bo consentimento. Lo destrui bo material biologico despues cu bo revoca bo consentimento. Si ya a ehecuta un of otro midimento cu bo material biologico te na e momento cu bo a revoca permiso, e informacion aki si lo wordo uza. Pa revoca e permiso di consentimento por tuma contacto cu e callcenter di DVG.

Tin un seguro pa personanan cu ta participa?

Bo persona no ta core risico ora di participa na e estudio, pesey DVG no mester cera un seguro pa e estudio aki. LabHOH ta segura bou di Medirisk.

Lo tin compensacion pa participacion?

Lo no tin ningun compensacion pa participacion na e investigacion aki. Lo bo haya sa si a encontra anticurpa contra SARS-CoV-2. Esaki ta nifica cu bo a wordo infecta cu SARS-CoV-2.

Mi tin pregunta. Ken mi lo por contact?

Si bo tin cualkier pregunta bo por tuma contacto cu callcenter di DVG na 280 0101. Pa Pa informacion independiente tocante participacion na e investigacion aki por tuma contacto cu bo dokter di cas. E dokter di cas ta independiente di e investigacion y pues no ta involucra den e investigacion. Linea directo Directie Volksgezondheid Tel: +297 5224200 Email: directie@despa.gov.aw Dialuna te cu diabierna di 8:00 pa 16:00. (no riba dianan di fiesta) Menciona cu bo ta participa na e estudio di seroprevalencia. Callcenter Tel: +297 2800101 Email: callcenterdvg@gmail.com Dialuna te cu diabierna di 8:00 pa 16:00. Menciona cu bo ta participa na e estudio di seroprevalencia.

Mi tin gana di participa den e estudio. Ki mi mester hasi awo?

Hopi bon cu bo tin gana di participa. Sigui e instruccionnan aki bou pa asina haya so con pa participa. Bo a encontra cualkier problema? Tuma contacto cu nos via callcenter na 280-0101.

E estudio aki a wordo aproba pa medico-etico?

Hunta di Revision medico-etico na Aruba a aproba e investigacion.

Mi a haya e carta di invitacion, pero aki no ta biba un persona den e categoria di edad menciona.

Si bo persona a ricibi e carta di invitacion na cas pero no tin un persona ta biba na e adres cu ta cay den e categoria di e edad menciona, ta wordo puntra pa tuma contacto cu callcenter 280 0101.

Con ta para cu mi privacidad?

Durante e estudio, informacion personal lo wordo colecta. E informacion aki lo wordo considera confidencial. For di rapport y publicacion di e investigacion lo no por saca afo cu e informacionnan personal ta di bo. Prome cu tuma cualkier muestra biologico di bo persona nos lo pidi bo permiso. E unico personanan cu lo tin un bista riba bo informacion personal relaciona cu e investigacion aki ta personal di LabHOH FSLMA (Fundacion Servicio Medico Laboratorio Aruba) y DVG relaciona cu e investigacion.